Archive for category: ልዩ ልዩ

“ኢየሱስም ከገሊላ ናዝሬት መጥቶ በዮሐንስ እጅ በዮርዳኖስ ተጠመቀ፡፡” ማር 1÷9

ክብር ምስጋና ይግባውና ጌታችን መድኃኒታችን ኢየሱስ ክርስቶስ ከእመቤታችን ከቅድሰት ድንግል ማርያም በኅቱም ድንግልና ተጸንሶ በኅቱም ድንግልና ተወልዶ በተወለደ 40 ቀኑ ዕጉለ ርግብ ዘውገ ማዕነቅ ይዞ ወደ ቤተ መቅደስ በመግባት፣በዓመት ሦስት ጊዜ ለበዓል ኢየሩሳሌም በመውጣት ሕግ መጽሐፋዊን ሕግ ጠባያዊን እየፈጸመ “በበህቅ ልህቀ እንዘ ይትኤዘዝ ለአዝመድሁ እንተ ይእቲ እሙ ” እንዲል ለእናቱ እየታዘዘ አድጎ 30 ዓመት ሲሆነው በእደ ዮሐንስ በማየ ዮርዳኖስ ይጠመቅ ዘንድ ከገሊላ ወደ ዮርዳኖስ ሄደ፡፡ ጌታችን መድኃኒታችን ኢየሱስ ክርስቶስም ይጠመቅ ዘንድ ወደ ዮርዳኖስ በሄደ ጊዜ የዮርዳኖስ ወንዝ ወደ ፊት መፍሰሱን ትቶ ሸሽቶ ወደ ኋላ ተመለሰ “አቤቱ ውኆች አዩህ ፣ውኆችም አይተው ፈሩ፤የውኆች ጥልቆች ተነዋወጡ ውኆቻቸውም ጮኹ” (መዝ. 76፥16) ዳግመኛም “ባሕር አየች ሸሸችም ዮርዳኖስም ወደ ኋላው ተመለሰ”(መዝ 113፥3) ተብሎ በቅዱስ ዳዊት የተነገረው ትንቢት ተፈጸመ፡፡

ጌታችን መድኃኒታችን ኢየሱስ ክርስቶስም እንደ ገና የሚሸሸውን ውኃ በቃሉ ስልጣን መልሶ አጽንቶታል፡፡ ጌታችን ኢየሱስ ክርስቶስም ቅዱስ ዮሐንስን አጥምቀኝ አለው፡፡አጥማቂው መጥምቁ ዮሐንስ እንደ ሆነ በትንቢት
የአዋጅ ነጋሪ ቃል፣የእግዚአብሔር መንገድ ጠራጊ ተብሎ የተገለጠ ነበር፡፡(ኢሳ 40፥3) ቅዱስ ዮሐንስም “ጌታ ሆይ እኔ በአንተ ልጠመቅ ይገባል እንጂ አንተ በእኔ በባርያህ ልትጠመቅ አይገባህም፡፡ አለ ጌታችንም አሁንስ ፍቀድልኝ እንግዲህ ጽድቅን ሁሉ መፈጸም ይገባናል” አለው (ማቴ 3÷14) ከዚያም ፈቀደለትና እንግዲያውስ በማን ስም ላጥምቅህ አለው? “አንተ ካህኑ ለዓለም በከመ ሢመቱ ለመልከ ጸዴቅ፤ወልዱ ለብሩክ ከሣቴ ብርሃን ተሣሃለነ” እያልክ “አጥምቀኝ” አለው፡፡ ቅዱስ ዮሐንስም “አንተ ካህኑ ለዓለም በከመ ሢመቱ ለመልከ ጸዴቅ፤ወልዱ ለብሩክ ከሣቴ ብርሃን ተሣሃለነ” እያለ አጥምቆታል፡፡ ጌታችን ኢየሱስ ክርስቶስም ተጠምቆ ወዲያው ከውኃ በወጣ ጊዜ ሰማያት ተከፈቱ መንፈስ ቅዱስም በርግብ አምሳል ወርዶ በጌታችን ራስ ላይ ተቀመጠ፤እነሆም ድምፅ ከሰማያት መጥቶ የምወደው በእርሱ ደስ የሚለኝ ልጄ ነው እርሱን ስሙት ብሎ ልዩ የሆነች ምሥጢረ ሥላሴን በዮርዳኖስ ገልጾባታል፡፡ ጌታችን ወደዚህ ዓለም የመጣው አዳምን እና ሔዋንን ከባርነት ነፃ ለማውጣት ነውና በዮርዳኖስ ወንዝ በሰይጣን ተቀብሮ የነበረውን በጥምቀቱ የዕዳ ደብዳቤያቸውን ቀደደላቸው። ይህንንም ቅዱስ ጳውሎስ እንዲህ በማለት ተናግሮታል። ‹‹እናንተም በበደላችሁና ሥጋችሁን ባለመገረዝ ሙታን በሆናችሁ ጊዜ፥ ከእርሱ ጋር ሕይወትን ሰጣችሁ። በደላችሁን ሁሉ ይቅር አላችሁ። በእኛ
ላይ የነበረውን የሚቃወመንንም በትእዛዛት የተጻፈውን የዕዳ ጽሕፈት ደመሰሰ።›› (ቆላ 2፥13-14)

በጌታችን መድኃኒታችን ኢየሱስ ክርስቶስ ጥምቀት ለሰው ልጅ ታላቅ ምሥጢር ስለተገለጠ የክርስቶስን ጥምቀት በመዘከር ጌታችን ከገሊላ ተነስቶ ወደ ዮርዳኖስ መጓዙን በማሰብ በጥምቀት ዋዜማ የእግዚአብሔር ታቦታት ከመንበረ ክብራቸው ተነሥተው በምስጋና ወደ ወንዝ ዳር ተጉዘው በድንኳን በማደር ሌሊቱን ስብሐተ እግዚአብሔር ተደርሶ፣ሥርዓተ ቅዳሴው ተፈጽሞ፤በወንዝ ዳር (በተገደበው ውኃ) ጸሎተ አኰቴት ከተደረሰ በኋላ ውኃው ተባርኮ ለተሰበሰበው ሕዝብ ይረጫል፤ይህም ጌታችን መድኃኒታችን ኢየሱስ ክርስቶስ ለእኛ ያሳየውን ትሕትና ለመመስከርና ከበረከተ ጥምቀት ለመሳተፍ የሚከናወን የቅድስት ቤተ ክርስቲያን ሥርዓት ነው፡፡

ስብሐት ለእግዚአብሔር

እንኳን ለመልአኩ ቅዱስ ገብርኤል ዓመታዊ በዓል በሰላም አደረሳችሁ።

አንድ አምላክ በሚሆን በአብ በወልድ በመንፈስ ቅዱስ ስም ታኅሣሥ ዐሥራ ዘጠኝ በዚህች ቀን የመላእክት አለቃ የመልአኩ የቅዱስ ገብርኤል የበዓሉ መታሰቢያ ነው። እርሱም በባቢሎን አገር ከነደደ እሳት ውስጥ በጨመሯቸው ጊዜ አናንያን አዛርያን ሚሳኤልን ያዳናቸው ነው።

ለእግዚአብሔር ምስጋና ይሁን እኛንም በአማልጅነቱ ይማረን ለዘለዓለሙ አሜን።

አርኬ
ሰላም ዕብል ኪያከ ክቡረ፤
ለስመ ዚአከ ገብርኤል እንዘ አነሥእ መዝሙረ፤
እግዚአብሔር መንበሮ ሰማየ ሰማያት ዘገብረ፤
ይትመሰል በአርአያከ አመ ጊዜ ሐወጸ ምድረ፤
እምነ መላእክት ኵሉ ስነከ አፍቀረ።

ስንክሳር ዘወርኃ ታኅሣሥ

(ሙሉ ታሪኩን ትንቢተ ዳንኤል 3፥1-ፍጻሜው ያንብቡ)

“ለሚፈሩህ ምልክትን ሰጠሃቸው፡፡” መዝ 59÷4

✞  እንኳን ለብርሃነ መስቀሉ በሰላም አደረሳችሁ✞

እግዚአብሔር አምላክ ከፈጠራቸው ፍጥረታት ሁሉ በአርአያውና በምሳሌው አክብሮ የፈጠረው ፍጥረት ሰው ነው፡፡ ነገር ግን “ሰው ክቡር ሆኖ ሳለ እንደ አላዋቂ ሆነ” ብሎ ቅዱስ ዳዊት እንደተናገረው (መዝ 48 ÷12) ሰው ነጻነቱንና ታላቅነቱን ባለማወቁ ትዕዛዘ እግዚአብሔርን ጥሶ ሕጉን በማፍረሱ የሞት ሞት አገኘው፡፡ ኋላም እግዚአብሔር ሰውን ከሞት ያድነው ዘንድ እግዚአብሔር ወልድ ከእመቤታችን ከቅድስት ድንግል ማርያም ከሥጋዋ ሥጋ ከነፍሷ ነፍስ ነስቶ ሰው ሆኖ በዮርዳኖስ ተጠምቆ በቀራንዮ አደባባይ በዕፀ መስቀል ተሰቅሎ ሞትን በሞቱ ገድሎ መርገመ ሥጋ መርገመ ነፍስን አጥፍቶ ሕይወትን ሰጥቶናል፡፡ በመስቀሉ ጥልን ገደለ እንዳለ፡፡ ኤፌ 2÷16

ጌታችን መድኃኒታችን ኢየሱስ ክርስቶስን የሰቀሉት አይሁድ ምንም በደል የሌለበትን ሰቅለው ገደሉት ይሉናል በማለት የጌታችን ክቡር አካሉ ያረፈበት፣ እጆቹና እግሮቹ የተቸነከሩበት፣ ጎኑ በጦር ተወግቶ ደሙ የፈሰሰበትን ቅዱስ መስቀል ክርስቲያኖች እየተሳለሙና እየዳሰሱ በተአምራት እንዳይድኑበት መስቀሉን ጉድጓድ ቆፍረው ቀብረውታል፡፡ ይህ ቅዱስ መስቀል ተቀብሮ ሦስት መቶ ዓመት ቢያስቆጥርም ቅዱስ ማቴዎስ በወንጌሉ “የማይገለጥ የተከደነ የማይታወቅ የተሰወረ ምንም የለምና” እንዳለ (ማቴ 10÷26) እግዚአብሔር በጥበቡ የተሰወረው ተገልጦ እንዲወጣ ፈቃዱ በመሆኑ ቅድስት እሌኒንና ልጇ ንጉሥ ቆስጠንጢኖስን መስቀሉን እንዲፈልጉ አድርጎ አስነሣቸው፡፡ ቅድሰት እሌኒም መስቀሉን ፍለጋ ከሮም ወደ ኢየሩሳሌም ተጓዘች፤ ልጇ ንጉሥ ቆስጠንጢኖስም የመስቀሉን ኃይልና አሸናፊነት በሰማይ ሰሌዳ በብርሃን ተቀርጾ ስላዬ ለእናቱ አስፈላጊውን ሁሉ አግዟታል፡፡ እሷም የመስቀሉን ነገር ስትመረምር ኪራኮስ የተባለ አረጋዊ መስቀሉ “ከሦስቱ ተራራዎች በአንዱ እንዳለ ይነገራል” ብሏታል

እርሷም ሱባኤ ብትገባ መልአከ እግዚአብሔር እያመለከታት ካህናትን ጠርታ ጸሎት አድርሰው ሕዝቡን ደመራ አሰብስባ ጸሎተ ዕጣን የተጸለየበትን ዕጣን በመጨመር ደመራው በእሳት ሲለኮስ የደመራው ጢስ (የዕጣኑ ጢስ) መስቀሉ ያለበትን ተራራ መስከረም ዐሥራ ስድስት ቀን አመላክቷታል፡፡ ለዚህ ነው ቅዱስ ዳዊት “ለሚፈሩህ ምልክትን ሰጠሃቸው፡፡” ያለው፡፡ እግዚአብሔርን በፍጹም ልባቸው በመፍራት ለሚያመሰግኑት ኃይሉን በማመን በፍጹም ልብ ለሚፈልጉት ምልክትን እንደሚያሳይ የመስቀሉ ነገር ታላቅ ምስክር ነው፡፡

ቅድሰት ንግሥት እሌኒ ምልክቱን ኳየች በኋላ በተራራው የተቀበረውን መስቀል ለማስወጣት መስከረም ዐሥራ ሰባት ቀን ማስቆፈር ጀምራ መጋቢት ዐሥር ቀን እንደ ፀሐይ የሚያበራው ጌታችን የተሰቀለበት መስቀል ከተቀበረበት ወጥቷል፡፡ ይህንን የደመራና የመስቀል በዓል የኢትዮጵያ ኦርቶዶክስ ተዋሕዶ ቤተ ክርስቲያን በዓለም አቀፍ በታላቅ ድምቀት ታከብረዋለች፡፡ እኛ አማኞች ሁላችንም መስቀል የማያቋርጥ የእግዚአብሔር ኃይል መገለጫ መሆኑን በማመን በዓሉን ወደ ደመራ ቦታ በመሄድ “መስቀል ከሁሉ በላይ ነው፤ዛሬ መስቀል ከበረ፣ዓለም ለድኅነት ተጠራ፣ሰውም ነጻ ወጣ፡፡” በማለት የቅዱስ ያሬድን ዝማሬ እየዘመርን በታላቅ ድምቀት እናከብረዋለን፡፡ የመስቀሉ ኃይል ጽንዕ ይሁነን፡፡

ስብሐት ለእግዚአብሔር
ወለወላዲቱ ድንግል
ወለመስቀሉ ክቡር አሜን፡፡

“ጻድቃንሰ ኢሞቱ ኀበ እግዚኦሙ ነገዱ”
“ጻድቃን ወደ ጌታቸው ሄዱ እንጂ አልሞቱም” ቅዱስ ያሬድ

በ መ/ር ሃፍታሙ ኣባዲ

ከአባታቸው ጸጋ ዘአብ ከእናታቸው እግዚእ ኀረያ በስእለት የተወlዱት ጻድቁ አባታችን አቡነ ተክለ ሃይማኖት ከሕጻንነታቸው ጀምሮ ድንቅ ተአምራትን እያደረጉ ዕውቀትንና ኃይልን ተመልተው በመንፈስ ቅዱስ የጸኑ ቅዱስ አባት ናቸው። ዲቁና ይሾሙ ዘንድ ወደ ጳጳስ በተወሰዱ ጊዜ “ይህ ልጅ የተመረጠ ዕቃ ይሆናል” ተብሎ ትንቢት ተነገረላቸው። ጌታችን መድኃኒታችን ኢየሱስ ክርስቶስ ብርሃነ ዓለም ቅዱስ ጳውሎስን ምርጥ ዕቃ ብሎ እንደጠራው አባታችን አቡነ ተክለ ሃይማኖት ስብከተ ወንጌልን ለማስፋፋት፣ ጣዖታትን ለማጥፋት፣ ሃይማኖትን ለማጽናት በእግዚአብሔር የተመረጡ ዕቃ ሆኑ። በዚህም ቅዱስ ጳውሎስን መሰሉት። በወጣትነት ዕድሜያቸው አራዊትን ሊያድኑ በሄዱ ጊዜ ጌታችን መልኩ በሚያምር ጎልማሳ አምሳል ተገለጠላቸው። “ወዳጄ አትፍራ ከእንግዲህ ወዲህ የኃጢአተኞችን ነፍስ ወደ ሕይወት የምታጠምድ ትሆናለህ እንጂ አራዊትን የምታድን አትሆንም ስምህ ተክለ ሃይማኖት ይሁን” አላቸው። በዚህም ዓሣ ከማጥመድ በወንጌል መርከብ ለመንግሥተ እግዚአብሔር የሰዎችን ነፍስ ወደ ማጥመድ የተጠራውን ስሙም ከኬፋነት ወደ ጴጥሮስነት የተቀየረውን የሐዋርያት አለቃ ቅዱስ ጴጥሮስን መሰሉት።

የጌታን ጥሪ ተቀብለው፣ ገንዘባቸውን ለድሆች ሰጥተው “ሰው ዓለምን ሁሉ ቢያተርፍ ነፍሱንም ቢያጎድል ምን ይጠቅመዋል” ብለው ወጡ። (ማቴ. 16፥26) ከሊቀ ጳጳሱም ዘንድ ቅስና ተቀብለው አገልግሎት ጀመሩ። በመላ ኢትዮጵያ እየተዟዟሩ ወንጌልን ሰበኩ። አስተምረው አጠመቁ፤ሕሙማንን ፈወሱ፤ ብዙ ተአምራትን አደረጉ። ጠንቋዮች እና ሟርተኞችን አጠፉ። ሁልጊዜ ያለ ማቋረጥ በጾምና በጸሎት በስግደት ተጠምደው መንፈሳዊ ተጋድሎን ተጋደሉ። በአንድ እግራቸው ለሰባት ዓመት ቆመው እስከ መጸለይ የበረቱ ሆኑ። ብዙ መከራም ተቀበሉ። “የጻድቃን መከራቸው ብዙ ነው፥ እግዚአብሔር ከሁሉ ያድናቸዋል። እግዚአብሔር አጥንቶቻቸውን ሁሉ ይጠብቃል፥ ከእነርሱም አንድ አይሰበርም።” (መዝ. 33፥19-20) ተብሎ እንደተጻፈ አባታችን ብዙ መከራ ተቀበሉ። እግዚአብሔርም ጠበቃቸው። “እስከ ሞት ድረስ የታመንህ ሁን የሕይወትንም አክሊልንም እሰጥሃለሁ” (ራእ. 2፥10) የተባለውን ቃል ኪዳን እያሰቡ እስከ መጨረሻ ጸኑ።

ጌታችንም “አንተ በመከራዬ መሰልከኝ እኔም በመንግሥቴ ከእኔ ጋራ እንድትመስለኝ አደርጋለሁ። እነሆ የዚህ ዓለም ድካምህ ተፈጸመልህ በእኔ ዘንድም የምቀበለው ሆነ ከእንግዲህ መንግሥተ ሰማያትን ትወርስ ዘንድ ና።” ብሎ ጠራቸው። በንዳድ በሽታ ጥቂት ታመው ዘጠና ዘጠኝ ዓመት ከስምንት ወር ከአንድ ቀን ዕድሜያቸው ነሐሴ 24 ቀን በለመለመ ዕርጅና ዐረፉ። “ሞቱን በሚመስል ሞት ከእርሱ ጋር ከተባበርን ትንሣኤውን በሚመስል ትንሣኤ ደግሞ ከእርሱ ጋር እንተባበራለን።” ተብሎ የተነገረውን በሕይወታቸው አሳዩ። (ሮሜ. 6፥5)አባታችን ቅዱስ ያሬድ “ጻድቃንሰ ኢሞቱ ኀበ እግዚኦሙ ነገዱ፥ በመንግሥተ ሰማይ ይሁቦሙ ዘፈደቁ” ጻድቃን ወደ ጌታቸው ሄዱ እንጂ አልሞቱም፤ በመንግሥተ ሰማይም የወደዱትን ይሰጣቸዋል፡፡ ብሎ እንዳመሰገነው የጻድቃን ዕረፍታቸው ሕይወታቸው ነው። ከኢየሱስ ክርስቶስ የተነሣ ሕያዋን ናቸው እንጂ ሙታን አይደሉም። “ትንሣኤና ሕይወት እኔ ነኝ፤ የሚያምንብኝ ቢሞት እንኳ ሕያው ይሆናል።” እንዲል። (ዮሐ. 11፥25) አምላካቸውም የሕያዋን አምላክ እንጂ የሙታን አምላክ አይደለም። (ማቴ 22፥31-32፤ማር 12፥27፤ሉቃ 20፥38) ጻድቃን ከአምላካቸው በተሰጣቸው ቃል ኪዳንም ከእግዚአብሔር ዘንድ ምሕረትና በረከትን ያሰጣሉ።

ጌታችን ኢየሱስ ክርስቶስ ለጻድቁ አባታችን አቡነ ተክለሃይማኖት “ስምህን ለሚጠራ፣ መታሰቢያህን ለሚያደርግ፣ ገድልህን ለሚጽፍ፣ ለሚያነበውና ለሚሰማው፣ ቤተ ክርስቲያንህን ለሚሠራ፣ በስምህ መባዕ ለሚሠጥ፣ ለድሆች በስምህ ለሚመጸውት፣ በመታሰቢያህም ቀን ለሚቆርብ ስለ አንተ በጎ ሥራ ለሚሠራ ሁሌ እኔ እስከ አሥር ትውልድ እምርልሃለሁ” ብሎ ቃል ኪዳን ሰጥቷቸዋል። እኛም ከዚህ ቃል ኪዳን እንድንጠቀም “የጻድቅ መታሰቢያው ለበረከት ነው” (ምሳ. 10፥7) የሚለውን አምላካዊ ቃል እያሰብን በእምነት በጻድቁ ስም የጽድቅን ሥራ ልንሠራ ይገባናል።

በዓሉ የሰላምና የፍቅር በዓል ይሁንልን፤የጻድቁ አባታችን አቡነ ተክለ ሃይማኖት በረከታቸው ይደርብን። አሜን

አምናለሁ አትቀሪም

/በ ሃይማኖት ተካ/

የታደለ ድንጋይ በአምላክ ተቀድሶ ታቦት ያሳድራል፤
ስሙ ተቀይሮ እየተሳለምነው ከብሮ ያስከብራል፤
የረገጥነው አፈር የተደገፍነው ግንድ ልጅሽ ከወደደ፤
ዘግነን ተቀብተን ቆርጠንም አጭሰን መዳኛ ይሆናል
እሱ ከፈቀደ::

ርግበ ጸዓዳ ሀገረ ክርስቶስ ቤተ ሃይማኖቴ፤
የመማጸኛዬ ቃልና ቀለሜ የምታረቅብሽ ርቱዕ አንደበቴ::
ነያ ሠናይት ጎትተሽ ውሰጂኝ አቅርቢኝ ከደጁ
ነያ ዕፀ ሕይወት ከበሩ አዝልቂኝ አስዳሺኝ በእጁ::
እንደተራራቁት እንደኒያ ድንጋዮች እንደታነጹብሽ፤
እጠብቅሻለሁ አንድ እስክታደርጊኝ አማልደሽ ከልጅሽ::
አምናለሁ አትቀሪም. . .

እንደሚለመልም ሰም እሳት ሲያቀልጠው፤
በስምሽ ተጠርቶ ድንጋዩ ተስቦ በእጅ በታነጸው::
ከምሥጢር እንዳንጎድል በቤተ መቅደሱ ተሰብስበንበት፤
በተሠራልን ልክ አውቀን እንድንኖር እንድንበቃበት፤
ነይ እመብርሃን ቦዶነታችንን ፍቅርሽን ሙይበት::
አምናለሁ አትቀሪም::